Në një prej lokacioneve të dyshuara për varrezë masive, që është përmendur tash e një kohë, ai i Jallovishtës në Rudnicë, do të fillojë të gërmohet nga e hëna.

Por këtë herë, pas shumë vjetësh, nuk do të jetë asnjë zyrtar nga Departamenti i Mjekësisë Ligjore në Kosovë, por vetëm ekspertë ligjorë nga EULEX’i dhe nga shteti i Serbisë, raporton KTV.

Komisioni serb për të pagjeturit është arsyetuar në mungesën e komunikimit me palën kosovare për fillimin e gërmimeve preliminare pa ekipin kosovar.

Një prej arsyeve që është përmendur ka qenë edhe mungesa e tashmë të ndjerit, akademikut Pajazit Nushi, që ishte pjesë e Grupit punues për persona të pagjetur.

Por Kushtrim Gara, nga Komisioni për Persona të Pagjetur, thotë se Nushi nuk ka qenë prezent në shumicën e aktiviteteve të fundit, dhe pavarësisht kësaj, komunikimi nuk ka munguar.

E në rast të fillimit të punimeve nga dita e hënë, rezultatet nuk do të merren parasysh thotë Gara, duke shtuar se do të tentojnë të jenë prezentë në Rudnicë.

Se pjesëtarët e EULEX’it nga Departamenti i Mjekësisë Ligjore do të jenë nga java e ardhshme në Rudnicë, e ka konfirmuar edhe misioni evropian.