Përpos peticionit prej të cilit i mblodhën 200 mijë nënshkrime, opozita pati paralamëruar edhe protesta masive gjithëpopullore, kundër marrëveshjes për Asociacionin dhe asaj për Demarkacionin me Malin e Zi. Mirëpo, përveç deklaratave ende nuk ka asgjë konkrete nga opozita për protestë
Raportimet e sotme të mediave të ndryshme vendore se opozita ka caktuar protestë për datën 21 nëntor, i ka demantuar zëdhënësi i AAK’së, Muharrem Nitaj.
Në një prononcim për Gazetën Express, Nitaj ka thënë se nuk ka ende datë për protesta. Ai ka thënë se është biseduar vetëm parimisht që në nëntor duhet të ketë protesta, por që raportimet që thonë se më 21 nëntor opozita ka caktuar protesta, janë spekulime.
“Është biseduar vetëm parimisht që duhet të mbahen protesta në nëntor, mirëpo nuk ka datë të caktuar, janë spekulime”, ka thënë Muharrem Nitaj për Gazetën Express.
