Gjergj Gjoni shqiptari 22-vjeçar është vrarë me një plumb të vetëm në zemër. Kjo është fjala e mjekësisë ligjore në Itali. Pensionisti italian Francesco Sicignano ka deklaruar se e ka vrarë të riu shqiptar pasi kishte hyrë në banesë për të vjedhur.
Megjithatë hetuesit kanë dyshime se shqiptari mund të jetë vrarë jo për grabitje, raporton “Milano Today”. Sipas tyre ka dyshime të arsyeshme se i riu shqiptar mund të jetë vrarë në oborrin e banesës, e më pas është futur brenda në shtëpi.
Dy ditë më parë, disa banorë ku ndodhi vrasja thanë se viktima njihej me pensionistin, madje shtuan se para disa kohësh ai kishte punuar për të. Provat e fundit, autopsia dhe dëshmia kontradiktore e pensionistit po e kthejnë çështjen në hetim për vrasje. Tashmë mbetet të përcaktohen edhe provat balistike dhe distanca se nga ku ka qëlluar pensionisti.
Pensionisti: Kush më thotë që duhet të qëlloja në ajër është idiot
Ka qenë e drejta ime për të hapur zjarr për vetëmbrojtje dhe të gjithë ata që shprehen kritikë ndaj kësaj, janë idiotë.
Kështu deklaron pensionisti italian për vrasjen e të riut shqiptar 22-vjeçarit, Gjergj Gjoni në Vapro D’Adda në Milano. Francesco Sicignano, pensionisti 65-vjeçar i akuzuar për vrasje me paramendim, foli për emisionin “Domenica Live” në Canale 5.
“Mbajtja e një armë duhet të jetë një e drejtë sot, – tha ai. Neni 2 i Kushtetutës thotë se shteti duhet të garantojë pronën private, por nëse nuk e bën këtë, kush duhet ta bëjë?, – shtroi pyetjen Sicignano.
Menjëherë më pas, shtoi: “Kush më thotë se duhet të qëlloja në ajër është një idiot”. Udhëheqësi i Ligës së Veriut, e njohur për qëndrimet e saj ekstreme kundër emigrantëve, shprehu solidaritet të plotë me 65-vjeçarin. Madje e siguroi atë se rajoni i Lombardisë do t’i paguajë të gjithë shpenzimet ligjore.
