Xhamajkë-Meksikë do të jetë finalja e Gold Cup, me skuadrën nga Karaibet që regjistruan surprizën e vërtetë në gjysmëfinale duke mundur favoritët kryesorë të SH.B.A. me rezultatin 2-1. Në sfidën e luajtur në Atlanta, amerikanët nuk arritën të shfrytëzonin faktorin fushë duke pësuar një humbje surprizë pavarësisht se e dominuan sfidën. Xhamajkanët, që luajtën dhe në Kupën e Amerikës, arritën të kalonin në epërsi në minutën e 30-të me një gol të Mattocks që shfrytëzoi një rivënie të gjatë me duar të Lawrence duke befasuar mbrotjen amerikane. Goli duket se tronditi amerikanët që pesë minuta më pas u ndëshkuar për herë të dytë këtë herë pas një goditje të Barnes. Në fillimin e pjesës së dytë Sh.B.A. arritën të shkurtonin që në fillim diferencën me një realizim të Bradley por vetëm kaq pas Xhamajka rezistoi ndërsa vendasit shpërdoruan një mori rastesh duke humbur 2-1 dhe duke mos arritur të shkojnë për herë të gjashtë radhazi në finale.
Meksika gjithashtu nuk e pati të thejshtë për të mundur, finalistët e edicionit të shkuar të Panamas. Meksikanët dhe pse luajtën në superioritet numerik për më shumë se 65 minuta në kohën e rregullt, arritën të fitonin vetëm në shtesë falë një 11-metërshi të shënuar nga Andres Guardado në minutën e 105-të. Panamaja megjithatë ishte shumë pranë finales. Goli I minutës së 56-të I Torresit u duk sikur kualifikoi panamezët, por në minutën e 88-të gjyqtari akordoi një 11-metërsh për Meksikën, e cila u godit pas plot 10 minutash nga ana e Guardados që barazoi ndeshjen në minutën e 99-të. Takimi shkoi në shtesë, dhe në fundin e pjesës së parë shtesë, sërish Guardado nga pika e bardhë I dha finalen meksikanëve.
