Sinead O’Connor, një prej emrave më të famshëm të muzikës kryesisht gjatë viteve 80 – 90, por jo vetëm, deklaron se zyrtarisht, muzika ka vdekur.
Duke iu referuar zgjedhjes së revistës “Rolling Stone”, për të shfaqur në kopertinë Kim Kardashian, artistja 48 -vjeçare ka akuzuar drejtpërdrejtë revistën, si përgjegjëse për fundin e muzikës.
Me anë të një postimi në Facebook, këngëtarja e “Nothing Compares 2 U” shprehu hapur zhgënjimin e saj, ndërsa nuk kurseu as fyerjet për Kim Kardashian.
“Çfarë bën kjo në kopertinën e Rolling Stone? Zyrtarisht, muzika ka vdekur. Kush do ta kishte menduar se do të ishte “Rolling Stone” që do ta vriste? Simon Cowell dhe Louis Walsh (krijuesit e X Factor) nuk do të jenë më fajtorët e vetëm. Bob Dylan mesiguri ndihet i tmerruar”, kështu deklaroi artistja irlandeze, ndërsa bashkangjitur kishte vendosur edhe kopertinën e “Rolling Stone” ku shfaqej Kim.
Kjo nuk është hera e parë që Sinead O’Connor flet hapur dhe sulmon disa prej emrave më në zë të momentit.
Në 2013 – ën ajo akuzoi Simon Cowell dhe X Factor për shkatërrim të industrisë së muzikës.
Ndërsa në dy raste të tjera, në 2013 dhe në 2014 – ën, O’Connor ka kritikuar ashpër bëmat e Miley Cyrus.
E themeluar në Nëntor të vitit 1967, në fokusin e revistës amerikane “Rolling Stone” qëndronte kultura popullore. Në kopertinat e saj kanë dalë disa prej emrave më të mëdhenj të të gjitha kohërave si, John Lennon, Jim Morrison, The Beatles, Jimi Hendrix, Janis Joplin etj.
Megjithatë, vitet e fundit kjo revistë e ka ndryshuar disi fokusin, duke pasqyruar tendencat e kohës. /tvklan.al
