Pas 100 ditësh lufte, Ukraina po lufton për kohën, pasi përpiqet t’i rezistojë zjarrit dërrmues rus në frontin e saj lindor aq gjatë sa armët perëndimore të mbërrijnë dhe t’i japin asaj avantazhin e nevojshëm.

Presidenti ukrainas, Volodymyr Zelensky tha se forcat ukrainase kanë pasur njëfarë suksesi duke luftuar kundër rusëve në qytetin e Severodonetsk, por situata e përgjithshme ushtarake në rajonin e Donbasit nuk ka ndryshuar.

Ai vazhdon t’i bëjë thirrje Perëndimit që të shtojë furnizimet me armë, shkruan Sky News.

Guvernatori i rajonit të Donetskut, tha se në Ukrainën lindore, forcat ruse po përpiqen të avancojnë në jug drejt qyteteve kyçe të kontrolluara nga ukrainasi, Kramatorsk dhe Sloviansk.

Ndërkohë, Uashingtoni planifikon t’i shesë Ukrainës katër dronë që mund të armatosen me raketa Hellfire, ndërkaq Kremlini tha se ata nuk do të kishin asnjë ndikim në operacionin e tij ushtarak.

ShBA-ja tani ka lëshuar sanksione të reja, me objektiva duke përfshirë disa jahte të lidhur me presidentin rus, Vladimir Putin dhe një oligark që drejton një prodhues të madh çeliku.

Bashkimi Evropian gjithashtu dha miratimin përfundimtar për sanksionet e reja ndaj naftës ruse dhe bankës kryesore Sberbank.

Rusia nuk e ka përjashtuar një takim mes Putinit dhe Zelenskyy.

Ministria e jashtme ukrainase tha se Ukraina po punon me partnerët ndërkombëtarë për të krijuar një mision të mbështetur nga OKB-ja për të rivendosur rrugët e anijeve në Detin e Zi./KlanKosova