Familjet e Hashim Thaçit, Kadri Veselit dhe Jakup Krasniqit kanë bërë thirrje për përgjegjësi institucionale dhe unitet qytetar, në një kohë kur procesi gjyqësor ndaj ish-krerëve të Ushtrisë Çlirimtare të Kosovës po vazhdon në Dhomat e Specializuara në Hagë.
Në një letër të publikuar nga deputeti i Kuvendit të Kosovës dhe djali i Jakup Krasniqit, Altin Krasniqi, familjet kanë shprehur mirënjohje për qytetarët e Kosovës për mbështetjen e tyre.
“Ne, familjet e Hashim Thaçit, Kadri Veselit dhe Jakup Krasniqit, bëjmë thirrje për përgjegjësi institucionale dhe unitet qytetar në këto momente”, thuhet në letër.
Familjet kanë falënderuar qytetarët për mbështetjen dhe solidaritetin e vazhdueshëm lidhur me procesin gjyqësor në Hagë.
“Shprehim mirënjohjen tonë të thellë për popullin e Kosovës për mbështetjen, solidaritetin dhe qëndrimin e tij të vazhdueshëm ndaj procesit gjyqësor në Hagë”, thuhet në deklaratë.
Në letër, familjet kanë kërkuar nga përfaqësuesit institucionalë që të veprojnë me përgjegjësi në raport me Dhomat e Specializuara.
“Presim sjellje të përgjegjshme shtetërore nga të zgjedhurit e popullit, në mbrojtje të Kushtetutës dhe ligjit, në raport me Dhomat e Specializuara”, thuhet më tej.
Familjet kanë reaguar edhe lidhur me ftesën për takim nga ushtruesja e detyrës së Presidentes, Albulena Haxhiu.
Ato kanë thënë se e vlerësojnë ftesën, por kanë kërkuar që takimi të zhvillohet pas vendimit të Kuvendit, me qëllim shmangien e keqkuptimeve rreth ndikimit të familjeve në vendimmarrjen institucionale.
“E vlerësojmë ftesën e Albulena Haxhiut, por, për t’iu shmangur çdo keqkuptimi të mundshëm lidhur me ndikimin dhe ndërhyrjet familjare në vendimmarrjen e institucioneve të Republikës së Kosovës, presim që të takohemi pas vendimit të Kuvendit”, thuhet në fund të letrës.
