Partia Demokratike e Kosovës ka paralajmëruar veprime konkrete ligjore pas vendimit dënues për ish-krerët e UÇK-së. Televizioni Dukagjini ka mësuar se iniciativa ka të bëjë me ndryshime që lidhen me shkallën e dytë të Gjykatës, ndërkohë që përkrahje tashmë ka dhënë Aleanca.
11 vjet pas themelimit të Dhomave të Specializuara për Kosovën, ligji për këtë mund të sillet për ndryshim në Kuvendin e Kosovës.
Një iniciativë e tillë është duke u diskutuar në Partinë Demokratike të Kosovës, ndërkohë që konkretizimin e saj kryetari i PDK-së, e ka paralajmëruar se do bëhet së shpejti.
“Veprimet tona do jenë veprime demokratike, përkrahje të procesit i cili është duke u zhvilluar në Hagë pa përjashtuar edhe veprimet ligjore të cilat do të konkretizohen me iniciativa ligjore në Kuvendin e Kosovës”, deklaroi kryetari i PDK-së, Bedri Hamza.
Televizioni Dukagjini ka mësuar se iniciativa ka të bëjë me ndryshimet që mund të lidhen me shkallën e dytë të Gjykatës, pra me Apelin, e që procedurat të mund të zhvillohen në Kosovë.
Por për iniciativa ligjore, sipas deputetes së PDK-së, Ganimete Musliu duhet bashkim i të gjitha partive politike.
“Vetë takimi i kryetarit të partisë mbrëmë me liderët partive politike është mesazh me vete dhe kuptohet që kanë filluar lëvizjes për të bërë më të mirën të mundshme por duhet të jenë të përgjegjshëm të gjithë jo vetëm PDK-ja ta marr barrën”, u shpreh Musliu.
Përkrahjen për çdo lloj iniciative që mund të vijë në Kuvend e kanë dhënë deputetët e Aleancës.
“Ne do e përkrahim pa hezitim. Është dashur të mbahet sepse që tri ditë janë dënuar ish krerët e UÇK-së, nuk e kemi mbajtur një seancë, derisa Shqipëria veç e ka mbajt një seancë urgjente për të dënuar ajo cfarë ka ndodhur..”, u shpreh deputetja e Aleancës, Time Kadrijaj.
Aktualisht konstituimi i Kuvendit të Kosovës, është kontestuar në Gjykatën Kushtetuese nga PDK-ja.
Lideri i saj, Bedri Hamza ka zhvilluar takime të ndara me kryeministrinë Albin Kurti, e kryetarët e LDK-së, e të Aleancës pas vendimit dënues ndaj ish-krerëve të UÇK-së, siç është thënë për të koordinuar veprimet institucionale tutje.
