Bashkëfshatarja e Hashim Thaçit, Elhame Hetemi ka rrëfyer emocionet e saj duke kujtuar momentet e para të organizim dhe mobilizimit popullor gjatë fillimit të luftës së Ushtrisë Çlirimtare të Kosovës.
Ajo ka folur për këto momente në emisionin “Kosova Live” në T7.
“Emocionet janë të veçanta. Duke u rikthyer në retroaktivë dhe duke menduar për gjithë procesin e fillimit të luftës së Ushtrisë Çlirimtare të Kosovës, kujtoj momentet më të rëndësishme të organizimit dhe mobilizimit popullor, bashkë me ata njerëz, ata djem të rinj që morën barrën e kombit shqiptar për t’u çliruar nga pushtuesit serbë”, ka thënë ajo.
Ajo ka kujtuar edhe momentin kur kishte dëgjuar se Thaçi ishte në krye apo bashkëorganizator i UÇK-së.
“Kur kujtoj momentet e para kur kam dëgjuar se është në krye, ose bashkëorganizator i UÇK-së, është njëri nga bashkëfshatarët e mi. Pastaj kujtoj edhe ushtarët e parë që u mobilizuan në fshatin Burojë, nismën time për t’i ndihmuar dhe për t’iu bashkuar atyre djemve për çlirimin e vendit”, ka deklaruar ajo.
Ajo ka thënë se njohja e afërt me këta persona dhe vlerat e tyre i kanë bërë emocionet e saj edhe më të thella.
“Duke i njohur nga afër, duke i njohur vlerat e tyre, edukatën dhe kulturën e tyre, emocionet e mia janë akoma më të thella dhe të arsyeshme”, është shprehur ajo.
Duke folur për procesin gjyqësor ndaj ish-krerëve të UÇK-së në Hagë, ajo ka deklaruar se beson se bëhet fjalë për një proces të montuar.
“Lirisht dhe bindshëm mund të them se është një proces i montuar dhe i organizuar nga ata që nuk e kanë dashur lirinë e Kosovës dhe nuk e kanë dashur lirinë e popullit shqiptar në përgjithësi”, ka thënë ajo.
