Kryeprokurori i Shtetit, Aleksandër Lumezi në konferencën për media ka bërë të ditur detajet sesi u zbuluan tetë zyrtarët policorë të arrestuar sot, e që dyshohet se janë të përfshirë në vepra të ndryshme penale.
Lumezi shtoi se Prokuroria fillimisht ishte duke kryer përgjime ndaj disa personave të tjerë për një vepër tjetër penale ku gjatë rrugës kanë marrë informacione se një zyrtar policor është i përfshirë.
“Sa i përket rastit të sotëm këtu kemi fillu përmes përgjimeve, kemi qenë duke përgjuar disa persona për një vepër tjetër penale që nuk kanë qenë të përfshirë zyrtarët policor dhe gjatë atij përgjimi kemi marrë informacione që edhe dikush nga zyrtarët policor është i involvuar në kryerjen e veprës penale dhe kjo mandej nga ka detyruar që të nxjerrim aktvendimin për zgjerimin e hetimeve dhe kemi arritur në këto informacione që sot prezantuam para jush”, tha Lumezi para gazetarëve.
E drejtori i Policisë së Kosovës, Samedin Mehmeti theksoi se hetimet kanë qenë komplekse dhe kanë kërkuar një kohë më të gjatë.
Sipas tij, me rëndësi është që janë të gatshëm të luftojmë krimin qoftë brenda organizatës, qoftë jashtë saj.
“Ne jemi të hapur për bashkëpunim dhe do të vazhdojmë me aksione të tilla qoftë brenda Policisë qoftë jashtë saj…Kur bëjmë hetime nuk shikojmë a është strukturë e lartë apo jo”, tha Mehmeti.
Ndryshe, në aksionin e sotëm të zhvilluar në bashkëpunim të ngushtë me Inspektoratin Policor të Kosovës (IPK) në orët e hershme të mëngjesit janë arrestuar tetë persona, zyrtar policor të cilët dyshohen për veprat penale ‘Keqpërdorimi i pozitës apo autoritetit zyrtar’, sipas nenit 414 të KPRK-së, ‘Keqtrajtim gjatë ushtrimit të detyrës ose autorizimeve publike’ neni 195, ‘Ushtrimi i ndikimit’ neni 424, si dhe ‘Blerja, posedimi, shpërndarja dhe shitja e paautorizuar e substancave narkotike’ sipas nenit 267”. /Telegrafi/
