Zemaj: Mos të fajësohet veç BE-ja për mosliberalizimin e vizave, por edhe ata që janë në krye të shtetit

E publikuar: 03/08/2022 14:30
Rreshtat+- AShkronjat+- Printo
Share:

Deputeti i LDK-së, Armend Zemaj, ka thënë se nuk mund të fajësohet vetëm BE-ja për mosliberalizimin e vizave për Kosovën, por edhe disa figura politike, të cilëve nuk ua ka përmendur emrin, të cilët siç tha ai, janë sot në krye të shtetit.

“Shprehim shqetësimet tonë për mungesën e liberalizimit të vizave për qytetarët e Kosovës, çështje kjo e cila e ka edhe shkakun, apo edhe e bëjnë disa faktorë, qoftë pozitiv, qoftë negativ. Në këtë padrejtësi të madh ndaj qytetarëve që po mbahen të izoluar dhe nuk mund të lëvizin lirshëm drejt vendeve të BE-së, s’mund të fajësojmë vetëm BE-në sepse është e ditur edhe këtu edhe botërisht që ne kishim një mundësi të artë në vitin 2015-16 kur Kosova ishte në një pako me Gjeorgjinë dhe Ukrainën, por të gjithë e dinë që kjo u pamundësua nga disa figura politike që sot janë në krye të shtetit”.

Ai poashtu përmendi edhe protestat e dhunshme, hedhjen e koktej molotovëve ndaj institucioneve të vendit, si shkak i mosliberalizimit të vizave.

“Edhe me disa zyrtarë tjerë në pengesën që iu bë ratifikimit të marrëveshjes për demarkacionin me Malin e Zi, besa u shfrytëzuan edhe format tjera të quajtura mjete politike, nga gazi lotsjellës, dhuna e shprehur në kuvend, me hedhjen e gjësendeve të ndryshme edhe jashtë saj, protesta të dhunshme dhe hedhjen e koktej molotovëve ndaj institucioneve të vendit”, tha Zemaj, njofton Klankosova.tv.

Ai tutje tha se Kosova i ka përmbushur të gjitha kriteret për liberalizimin e vizave.