Verifikimi i diplomave, ministrja Nagavci vjen me një njoftim

E publikuar: 22/07/2022 16:38
Rreshtat+- AShkronjat+- Printo
Share:

Ministrja e Arsimit, Shkencës, Teknologjisë dhe Informacionit (MASHTI), Arbërie Nagavci, ka njoftuar se ka filluar zgjidhjen e një problemi shumëvjeçar – atë të verifikimit të diplomave.Përmes një postimi në Facebook, ajo ka bërë të ditur se kanë formuar një Komision për trajtimin e këtyre rasteve, i cili deri tani ka verifikuar diplomat e 15 mijë e 468 studentëve.

Tutje, ka thënë se dhjetëra mijëra studentë të Kosovës që kanë përfunduar studimet në arsimin e lartë, për një kohë të gjatë nuk kanë mundur t’i verifikojnë diplomat e tyre dhe si rrjedhojë nuk kanë mundur t’i përdorin ato për shkollim apo punësim jashtë vendit.

“Kjo për shkak të problemeve të krijuara me librat amëz, si pasojë e rënies pre e mashtrimeve, apo edhe e neglizhencës dhe gabimeve të zyrtarëve të caktuar”, ka shkruar Nagavci në Facebook.“Me qëllim të gjetjes së zgjidhjes, kam formuar një komision për të trajtuar këto raste. Përfundimisht, pas kaq shumë vitesh, Komisioni deri më tash ka bërë zgjidhje për 15.468 raste dhe tashmë këta studentë mund t’i përdorin diplomat dhe të vazhdojnë me planet e tyre për të ardhmen”.

Komisioni siç ka thënë ministrja, do të vazhdojë me trajtimin e rasteve të studentëve të cilët janë dëmtuar pa fajin e tyre.“Ndërkaq, për shkak të dyshimeve për keqpërdorime në këtë proces, ka raste që i kemi adresuar në organet e drejtësisë dhe presim që ato të trajtohen”.

Sqarim: Ndalohen fyerjet dhe përdorimi i gjuhës ofenduese. INFOSOT mban të drejtën e publikimit ose jo të një komenti të caktuar. Përmbajtja e komenteve nuk pasqyron, qëndrim editorial të redaksisë së portalit INFOSOT. Ju faleminderit për mirëkuptimin!