Kreu i Grupit Parlamentar i Partisë Socialiste, Taulant Balla, ka kërkuar sot që vaksinimi për deputetët të bëhet me detyrim.
Balla u shpreh se dhe në vende të tjera në Europë, për deputetët kërkohet pasaporta e vaksinimit, ndaj dhe në Shqipëri duhet të merret një masë e tillë.
“Nëse në Bundestag nuk mund të hysh nëse nuk ke ‘Green Pass’, le ta bëjmë dhe këtu. Kjo ka qenë një dakordësi edhe nga nën kryetari i Kuvendit, Alibeaj dhe nga kreu i grupit të PD, Rushaj, por dhe nga Fatmir Mediu si kreu i një grupi tjetër parlamentar”, tha Balla.
Më tej ai u shpreh së Kuvendi duhet të jetë një shembull i respektimit të rekomandimeve që jep Komiteti i Ekspertëve.
“Shqipëria është në kushtet e një pandemie, Kuvendi duhet të jetë shembull i respektimit të rekomandimeve që jep Komiteti i Ekspertëve. Kjo nuk është një çështje e seancës, por është një çështje që kërkon diskutim”, shtoi ai.
Një kërkesë e tillë u bë dhe nga deputeti i PD, Enkelejd Alibeaj, i cili tha se nuk mund të vijohet me një situatë të tillë./tvklan
