Sistemi Informativ Shëndetësor, ende jo funksional

E publikuar: 15/02/2018 20:12
Rreshtat+- AShkronjat+- Printo

Rreth 10 milionë kishte ndarë qeveria e Luksemburgut për funksionalizimin e Sistemit Informativ Shëndetësor, për një periudhë dhjetëvjeçare, raporton KTV.

Megjithëse, kanë kaluar tetë vjet nga nisja e zbatimit të kësaj strategjie, ky sistem ende nuk është plotësisht funksional. Sistemi Informativ Shëndetësor është parakusht për nisjen e mbledhjes së premiumeve. Ky sistem ka për qëllim mbledhjen e të dhënave rreth sëmundjes së pacientëve dhe diagnozat, të dhëna këto në të cilat do të kenë qasje vetëm mjekët.

Sipas raportit të Auditorit të Përgjithshëm, të cilin e ka siguruar KTV-ja, Ministria e Shëndetësisë nuk ka arritur të shtrijë projektin në 30% të vendit. Auditimi për këtë projekt u kërkua përmes një rezolute të deputetëve të legjislaturës së kaluar.

Në raport thuhet se mungesa e të dhënave për pacientë, mungesa e medikamenteve, të dhënave për trajtime si dhe mungesa e të dhënave të sëmundjeve të tjera ka rezultuar në trajtim shëndetësor joefikas për pacientët. Raporti do të diskutohet në Komisionin për Shëndetësi në mbledhjen e radhës.