Deklarata e kryeministrit të Shqipërisë, Edi Rama dje në Tiranë në lidhje me Demarkacionin me Malin e Zi ka shkaktuar reagime në Kosovë. E sidomos tek ata që kanë kundërshtojnë versionin aktual të Demarkacionit.
Pas deputetit të Vetëvendosjes Albin Kurti, sot ka reaguar edhe deputeti i Nismës Bilall Sherifi.
Ai ka thënë se Rama është mirë që të aplikojë filozofinë e heshtjes.
Postimi i Sherifit në Facebook:
Filozofia e Heshtjes!
Nëse kryeministri i Shqipërisë, cilido qoftë ai, për arsye diplomatike nuk mund të prononcohet lidhur me çështje të caktuara atëherë duhet ta aplikojë filozofinë e heshtjes.
Është e papranueshme të veprohet si kryeministri aktual z. Edi Rama që mohon faktet e pakontestueshme lidhur me çështjen e demarkacionit të kufirit me Malin e Zi duke i shpallur si të ishin opinione individuale.
Zoti Rama duhet t’i kushtojë vëmendjen e duhur këtyre fakteve të cilat janë të argumentuara aq bindshëm sa që as preferencat individuale e as kontekstet diplomatike nuk lejojnë të thuhet e kundërta.
