Sekuestrohen barna me banderola të Serbisë të dyshuara si kontrabandë

E publikuar: 06/03/2018 11:39
Rreshtat+- AShkronjat+- Printo

Policia ka bërë të ditur se ka sekuestruar sasi të barnave të dyshuara për kontrabandë, me banderola të Serbisë dhe afat të skaduar, në vlerë rreth 20 mijë euro.

“Gjatë një operacioni të suksesshëm, Policia e Kosovës, konkretisht Sektori i Hetimeve i Departamentit të Policisë Kufitare në Prishtinë, të asistuar edhe nga njësitet tjera të Policisë së Kosovës, me urdhër të gjyqtarit të procedurës paraprake të gjykatës kompetente, ka kryer operacion policor të bastisjeve në tri lokacione të ndryshme në rajonin e Prishtinës”, thuhet në njoftimin e policisë.

“Gjatë operacionit policor është gjetur sasi e konsiderueshme e barnave të dyshuara si mallra kontrabandë me banderola të Serbisë dhe afat të skaduar”, thuhet më tej aty.

Zyrtarët doganorë dhe zyrtarët e Inspektoratit për produkte dhe pajisje medicinale, kanë ofruar asistencën e tyre gjatë bastisjes, të cilët kanë evidentuar dhe sekuestruar barnat e dyshuara.

Një person i dyshuar është arrestuar në këtë operacion dhe pas intervistimit të tij, me urdhër të prokurorit të rastit nga prokuroria kompetente, ai është liruar në procedurë të rregullt.

Sipas vlerësimit fillestar vlera e barnave – medikamenteve të sekuestruara është në vlerë rreth 20 000 euro./Insajderi.com