Qeveria e Kosovës sot ka marrë vendim për ta shfuqizuar vendimin për shpronësimin e pronave të paluajtshme në Brezovicë, vendim ky që u mbështet edhe nga ministrat serb, por që u kundërshtua ashpër nga ministrat Dardan Gashi e Besim Beqaj.
Pas dështimit të privatizimit të Brezovicës, vendimi i sotëm i qeverisë u vlerësua, si një mesazh tjetër i keq që Kosova përqon te investitorët e huaj.
Zv.kryeministri dhe ministri i Diasporës, Dardan Gashi, pas kundërshtimit që i ka bërë këtij vendimi në mbledhjen e qeverisë, në një prononcim për Gazeta Metro ka thënë se një vendim i tillë është kundër interesave të Kosovës.
Vendimi i sotëm i Qeverisë për të shfuqizuar shpronësimin e pronave private në Brezovicë, sipas ministrit Gashi, bie në kundërshtim me interesin e investitorëve potencial të jashtëm.
Kërkesa e sjellë në Qeveri nga ministrja e Mjedisit, Albena Reshitaj, e që mori mbështetjen edhe të ministrave serbë në qeverinë e Kosovës, u kundërshtua nga ministri Gashi, i cili tha se projekti është ende i hapur, dhe në këtë formë Kosova u dërgon sinjal negativ investitorëve të huaj potencial, nëse pika kyqe, pra prona bllokohet.
Por, arsyetimi i ministres Reshitaj, ishte se projekti i qendrës së skijimit në Brezovicë kishte dështuar, dhe tani qytetarët po kërkonin paratë e shpronësimit, duke e dërguar shtetin edhe nëpër gjykata.
Projekti i qendrës së skijimit në Brezovicë, i cili tashmë ka dështuar, ishte kundërshtuar ashpër edhe nga Beogradi, pasi pretendonte pronësinë e komplekseve turistike aktuale në atë zonë.
