Tre të arrestuarit për vrasjen e trefishtë në Gllogjan të Deçanit dyshohen për vrasje të rëndë dhe armëmbajtje pa leje, tha zëdhënësi i Prokurorisë Themelore të Pejës, Shkodran Nikçi para mediave, pasi Prokuroria dorëzoi kërkesën për caktimin e paraburgimit ndaj tyre, raporton Gazeta Express.
Nikçi tha se kërkesa e prokurores së rastit u elaborua sot në seancën e procedurës paraprake në Gjykatën Themelore në Pejë.
“Tre persona janë ndaluar për rastin e vrasjes së trefishtë në Gllogjan dhe plagosjen e një personi, me ç’rast prokurorja e çështjes brenda afatit ligjor ka parashtruar kërkesën për caktimin e masës së paraburgimit. Me ç’rast, kjo kërkesë është elaboruar sot gjatë seancës e procedurës paraprake dhe shpresojmë që gjyqtari të marr vendim për këtë kërkesë”, tha Nikçi.
Ai theksoi se “Çështja është e ndjeshme, andaj duhet të jemi të rezervuar”.
Nikçi tha shpreson që gjykatësi ta marrë vendimin e duhur.
Mbrëmë, Halil Mehmetaj është arrestuar bashkë me dy djemtë e tij, Kreshnikun e Malsorin,si të dyshuar për krimin mizor të mbrëmjes së 26 nëntorit në Gllogjan të Deçanit. Ata sot kanë dalë për herë të parë para Gjykatës, ndërsa pritet t’u caktohet masa e paraburgimit, sipas kërkesës së Prokurorisë
Një ditë pas sulmit ndaj autobusit që ua mori jetën dy nxënësve dhe shoferit, Halil Mehmetaj kishte folur për mediat, duke e përshkruar ngjarjen si të tmerrshme. Në një paraqitje për televizionin publik, ai u kishte shprehur ngushëllime familjarëve të viktimave.
