E gjitha filloi me themelimin e partisë së re, dikur Nisma për Kosovën, nën udhëheqjen e Fatmir Limajt dhe Jakup Krasniqit, i pari ish-deputet i Kuvendit të Kosovës nga rradhët e PDK-së, e i dyti ish-kryetar i Kuvendit po ashtu nga rradhët e Partisë Demokratike të Kosovës.
Kjo parti që më vonë mori emrin Nisma Socialdemokrate, mbeti ende me muhabete të pakryera me PDK-në e dikur Hashim Thaçit, e edhe tash me atë të Kadri Veselit.
Që nga fillimi i hartimit të platformave për dialogun me Serbinë, kjo parti ishte kundër që këtë dialog ta udhëheq presidenti aktual i Kosovës, dikur kryetar i PDK-së, Hashim Thaçi, ani pse ky i fundit gjatë mandatit të tij si kryeministër i kishte udhëhequr këto bisedime, shkruan lajmi.net.
As lidhja e koalicionit mes Partisë Demokratike të Kosovës, Nismës dhe AAK-së nuk duket se e përfundoi këtë “luftë në heshtje “ të këtyre dy partive.
Edhe pse në koalicion, Fatmir Limaj si udhëheqës i Nismës në njërën anë, dhe Kadri Veseli si lider i PDK-së në anënë tjetër, rrallë herë u panë bashkë në fushatë elektorale, e edhe në ato raste që ishin të dy prezent, ishin të ulur larg njëri tjetrit dhe nuk shihej të komunikonin.
E Limaj për këtë çështje kishte thënë se një fushatë ndaraz e forcon koalicionin.
“Edhe me AAK-në, që jemi për më shumë se një vjet bashkë, fushatat i kemi bërë të ndara”, kishte deklaruar ai.
Përplasjet e kohë pas kohshme në parlament, kulmuan me polemikat e fundit të ashpra ndërmjet deputetit të Nismës Socialdemokrate, Milaim Zekës, dhe kryetarit të Drenasit nga rradhët e PDK-së, Ramiz Lladrovcit.
Zeka në një debat të mbrëmshëm televiziv deklaroi se ekzistojnë letra të cilat dëshmojnë se Lladrovci e kishte akuzuar presidentin e vendit, Hashim Thaçin për vrasjen e Behadin Hallaqit.
E këtyre akuzave iu kundërpërgjigj sot Lladrovci, duke e quajtur gënjeshtar Milaim Zekën, dhe duke paralajmëruar padi ndaj këtij të fundit.
Kjo polemikë vazhdoi edhe më tutje me deklaratat e Zekës se këto dokumente është i gatshëm t’ia paraqesë edhe gjykatës si dëshmi.
E pikërisht një kandidat nga Nisma Socialdemokrate ishte kundërshtari kryesor i Lladrovcit të PDK-së në Drenas, e ai ishte Isa Xhemajlaj. Ndërkaq kundërkandidati tjetë i Lladrovcit, Xhavit Drenorit, si edhe vazhdimisht, edhe mbrëmë i doli punë që ta akuzojë Lladrovcin për mungesë aftësie në qeverisje dhe fjalor të pamenduar.
Ndryshe, kryetari i Nismës, Fatmir Limaj, shërbeu si ministër i Transportit dhe Telekomunikacionit të Kosovës nga rradhët e PDK-së për një periudhë 3 vjeçare, për t’u ndarë përfundimisht nga PDK-ja më 2014, dhe për të formuar Nismën për Kosovën së bashku me Jakup Krasniqin si kryetar të këshillit të partisë. /Lajmi.net/
