Një i vdekur në Malishevë, dyshohet që nipi ka vrarë axhën për çështje prone

E publikuar: 28/04/2023 12:15
Rreshtat+- AShkronjat+- Printo

Policia e Kosovës ka konfirmuar se sot rreth orës dhjetë të mëngjesit është raportuar për një rast vrasjeje në fshatin Kijevë të Malishevës. Pas daljes në vendin e ngjarjes, është gjetur një person i moshës madhore që dyshohet se ishte pa shenja jete, raporton Express.

Vdekjen e tij siç konfirmon policia e ka konstatuar ekipi mjekësor në venin e ngjarjes.

Për rastin është arrestuar një i dyshuar derisa hetimet po vazhdojnë.

“Sot rreth orës 09:50 është raportuar për një rast vrasje në fshatin Kijevë-Malishevë. Në vendin e ngjarjes, menjëherë kanë dalë njësitet e nevojshme policore ku është gjetur një person mashkull (i moshës madhore dyshohej pa shenja jete). Vdekjen e tij e ka konstatuar ekipi mjekësor në vendin e ngjarjes. Lidhur me rastin është arrestuar një i dyshuar, mashkull i moshës madhore. Rrjedha e mëtejme hetimore është duke vazhduar në koordinim me prokurorin e shtetit në drejtim të veprës penale të vrasjes”, ka thënë Sheremet Elezaj nga Policia e Kosovës.

Sipas burimeve të Express brenda policisë, viktima është rreth moshës 60 vjeçare derisa i dyshuari për vrasjen rreth moshës 37-38 vjeçare. Motivi dyshohet se ka qenë për çështje pronësore.