MPJD flet për gjendjen e të lënduarve në Kroaci: 26 pacientë janë në proces lirimi, 15 të tjerë do të vazhdojnë trajtimin spitalor

E publikuar: 26/07/2021 16:23
Rreshtat+- AShkronjat+- Printo

Vetëm njëri nga të lënduarit në aksidentin e djeshëm është në gjendje më të rëndë shëndetësore.

Ministria e Punëve të Jashtme dhe Diasporës ka dalë me detaje të reja në lidhje me gjendjen shëndetësore të qytetarëve që kanë pësuar lëndime në aksidentin e ditës së djeshme në Sllavonski Brod.

“Ministria e Punëve të Jashtme dhe Diasporës (MPJD), nga komunikimi me autoritetet kroate përmes ambasadës së Kosovës në Zagreb, lidhur me gjendjen e bashkatdhetarëve të aksidentuar dje në Sllavonski Brod, njofton opinionin publik se nga të dhënat e konfirmuara deri në orën 14:00, janë 26 persona në proces të lirimit nga spitali”, njofton ministria.

Trajtimin mjekësor në spital do ta vazhdojnë 15 persona gjendja shëndetësore e të cilëve është stabile.

Sipas raportit të autoriteteve shëndetësore kroate, vetëm një rast është në gjendje më të rëndë.