Dy aeroplanë rusë që shkelën hapësirën ajrore suedeze në fillim të këtij muaji ishin të pajisur me armë bërthamore, shkruan Daily Mail.
Kalimi pranë ishullit Gotland më 2 mars ishte një akt i qëllimshëm i krijuar për të frikësuar Suedinë, sipas kanalit suedez të lajmeve TV4 Nyheterna.
Gjithsej katër aeroplanë ishin nisur nga baza ajrore ruse e Kaliningradit. Skuadra përbëhej nga dy aeroplanë sulmues Sukhoi 24, të cilët u shoqëruan nga dy aeroplanë luftarakë Sukhoi 27.
Ishin dy aeroplanët sulmues, të cilët sipas burimeve të TV4 Nyheter ishin të pajisur me armë bërthamore.
Shkelja e territorit suedez zgjati rreth një minutë. Forcat ajrore të vendit ngritën në ajër dy aeroplanë JAS 39 Gripen, të cilat fotografuan ndërhyrësit. Pikërisht atëherë, thonë mediat suedeze, u konfirmua se aeroplanët rusë ishin të pajisur me koka bërthamore.
“Ky është një sinjal për Suedinë se ne kemi armë bërthamore dhe ne gjithashtu mund të konsiderojmë përdorimin e tyre”, tha eksperti strategjik ushtarak Stefan Ring për TV4 Nyheter.
“Ne e vlerësojmë si një veprim të qëllimshëm”, shtoi shefi i Forcave Ajrore Carl-Johan Edström.
Incidenti erdhi disa ditë pasi presidenti rus Vladimir Putin kishte kërcënuar me veprime ushtarake kundër Suedisë dhe Finlandës fqinje nëse do t’i bashkohen NATO-s.
Vendet kishin kryer stërvitje të përbashkëta ushtarake në atë kohë.
