Zvicra nuk do të dëbojë azilkërkuesit në Hungari

E publikuar: 01/10/2017 23:40
Rreshtat+- AShkronjat+- Printo

Zvicra, njëherë për njëherë nuk do të kthejë në Hungari azilkërkuesit kundër vullnetit të tyre, edhe pse këtë gjë ia mundëson Marrëveshja e Dublinit, ku Zvicra është nënshkruese.

Sekretariati Shtetëror për Migracion (SEM) planifikon që fillimisht t`i sqarojë me Hungarinë kushtet e pranimit të azilkërkuesve që ofron ajo, shkruan “NZZ am Sonntag” sot, përcjell Albinfo.ch. Këto masa po merren për të zbatuar një vendim që Gjykata Federale Administrative e Zvicrës kishte marrë në maj të këtij viti.

Vendimi në fjalë u rekomandonte autoriteteve të vendit ndalimin e kthimit të refugjatëve në Hungari, edhe në rastet kur ata në atë shtet e kanë paraqitur për herë të parë kërkesën për azil. Kjo për faktin se ishte konstatim i përgjithshëm se Hungaria nuk ofronte kushtet e domosdoshme për strehim të azilkërkuesve.

Ndërsa SEM në qëndrimin e tij synon që para se të vendosë për lejimin e kthimit të azilkërkuesve në Hungari të hetojë nëse në atë vend ka shkelje sistematike të të drejtave të azilkërkuesve.

Nga fillimi i këtij viti deri më tash, Zvicra ka dëbuar 12 azilkërkues në Hungari ndërsa ka bërë 102 kërkesa të tjera për një gjë të tillë.