Kryeministri serb Aleksandër Vuçiq është pritur me gurë e hedhje shishesh uji e sendesh të tjera të forta nga turma e mbledhur për të përkujtuar masakrën e vitit 1995 në Srebrenicë.

Në ceremoninë e sotme përkujtimore ishin të pranishëm edhe ish-Presidenti amerikan Bill Clinton, si dhe dinjitarë të tjerë nga vende të ndryshme të botës.

Një rezolutë e OKB-së për Srebrenicën u hodh poshtë pak ditë më parë në Këshillin e Sigurisë të OKB-së nga Rusia, e cila vendosi veton duke e quajtur “përçarëse”.

Një qëndrim të ngjashëm publik mbajti edhe Serbia. Megjithatë, këtë të shtunë, Vuçiq shprehu “zemërim dhe hidhërim” ndaj kryerësve të masakrave.

“Serbia qartazi dhe pa mëdyshje dënon këtë krim të tmerrshëm dhe është e neveritur ndaj të gjithë atyre që morën pjesë, dhe do të vazhdojë t’i sjellë ata para drejtësisë”, tha ai.

Kjo deklaratë shkon përkundër një deklarate të mëparshme të Vuçiqit në 20 korrik 1995, menjëherë pas kësaj masakre, kur ai deklaronte se “për çdo serb të vrarë, do të vrisnin 100 myslimanë”.

Megjithatë, prej kohësh Vuciqi i sotëm ka kthyer kursin e timonit të politikës serbe, duke u larguar nga e shkuara e vendit dhe nga vëllazëria e saj me Rusinë, dhe duke u orientuar përherë e më shumë drejt Bashkimit Europian dhe Perëndimit.

Megjithatë, zemërata e turmës në Srebrenicë, e detyroi Kryeministrin e Serbisë dhe shpurën e tij që të vraponin drejt makinave të tyre nën një breshëri sendesh që u hidheshin.

Ndërkaq, në sfond, dëgjohet imami mysliman i pranishëm në ceremoni që u bën thirrje të pranishmëve të përmbahen dhe “të mos e humbin dinjitetin”.

Një lule dhimbjeje për Vuçiqin

Para incidentit, në mbërritjen e tij ceremoniale, Vuçiq u prit nga një përfaqësuese e Nënave [të viktimave] të Srebrenicës.

Hatixha Mehmedoviq pasi takoi Kryeministrin e Serbisë, i vendosi atij një lule përkujtimore të masakrës në xhepin e përparme të xhaketës.

Vuçiq shtrëngoi duart me të moshuarën me një pamje dinjitoze dhe duke i treguar gjithë respektin ceremonial.

Masakra e Srebrenicës është cilësuar si më e keqja që nga Lufta e Dytë Botërore.

Rreth 7,000 burra e djem myslimanë boshnjakë u vranë nga forcat serbe-boshnjake, pasi ata morën në kontroll zonën e konsideruar si të sigurt nga Kombet e Bahskuara në korrik të vitit 1995.

Para pak ditësh, Ban Ki Moon pranoi dështimin e OKB-së në mbrojtjen e civilëve boshnjakë, duke pohuar edhe përgjegjësinë e kësaj organizate në masakrën e ndodhur./kallxo.com/