Vjedhja e 2 milionë eurove në Thesar, Bajrami thotë se nuk dorëhiqet

E publikuar: 21/10/2020 22:11
Rreshtat+- AShkronjat+- Printo

Ministrja e Financave, Hykmete Bajrami ka hedhur poshtë mundësinë e dorëheqjes pas vjedhjes së mbi dy milionë eurove nga Thesari i Kosovës, duke thënë se drejtësia do t’i jep dënimin e merituar çdokujt që ka dorë në këtë abuzim.

Partia Demokratike e Kosovës kërkoi dorëheqjen e ministres Bajrami, pas shpërthimit të skandalit në lidhje me miliona euro të keqpërdorur.

Por, kjo e fundit në Debat Plus të TV Dukagjinit e bëri të qartë se nuk do të ofrojë dorëheqje.

“Ndoshta më e lehtë do të ishte të jap dorëheqje dhe të marrë një përgjegjësi që nuk më takon dhe ata që e kanë bërë krimin të veprojnë të lirë. Po të shihet përgjegjësi e imja, unë menjëherë do të isha dorëhequr”, u shpreh Bajrami.

2.1 milionë euro nga Thesari i Shtetit kanë shkuar në llogari të një operatori ekonomik, e lidhur me këtë rast janë suspenduar dy punëtorë të Thesarit të Shtetit, derisa njëri edhe është arrestuar. Ky i fundit që dyshohet se ka kryer transaksionin, për 11 vjet ka qenë punëtor i Thesarit të Shtetit.

Mjetet janë tërhequr nga buxheti i Ministrisë së Infrastrukturës më 9 tetor, e vetëm dje është denoncuar rasti. Lidhur me rastin janë njoftuar organet e rendit, por nuk janë dhënë detaje se te cili operator ekonomik janë transferuar paratë.