Kryeparlamentari, Kadri Veseli përmes një postimi në Facebook ka bërë thirrje për kujdes në trafik, pas numrit të madh të aksidenteve me fatalitet.
Që nga janari i këtij viti sipas Policisë 52 persona kanë humbur jetën në trafik, transmeton Koha.net.
“Ditëve të fundit mediat janë mbushur me lajme të hidhura për aksidente fatale nëpër rrugët e Kosovës. Sipas Policisë së Kosovës, 52 persona kanë humbur jetën që nga janari i vitit 2019 si pasojë e aksidenteve rrugore, kurse qindra të tjerë janë lënduar. Prandaj miq të dashur, ju bëj thirrje që të respektoni sa më shumë rregullat e sigurisë rrugore. Ju lutem të ulni shpejtësinë, vendosni rripin e sigurimit, shmangni përdorimin e telefonave mobil dhe ajo që është më e rëndësishme, mos pini kur keni për të vozitur”, ka shkruar Veseli në Facebook.
