Kryetari Kosovës Hashim Thaçi përmes Facebookut sapo ka treguar se sot ka biseduar me kryetarin e Serbisë Aleksandar Vuçiq rreth marrëdhënieve ndërmjet dy vendeve, transmeton Koha.net.
Ai ka thënë se me Vuçiqin ka folur edhe rreth mundësisë së përfshirjes së Serbisë në hetimet për t’u zbuluar vrasësi i Oliver Ivanoviqit.
Ky është postimi i plotë:
“Presidenti i Republikës së Kosovës, Hashim Thaçi, zhvilloi një bisedë telefonike me Presidentin e Republikës së Serbisë, Aleksander Vuçiç.
Në këtë bisedë telefonike, të dy presidentët trajtuan çështjet e ndryshme të interesit të përbashkët, duke u fokusuar në domosdoshmërinë e vazhdimit të dialogut për normalizimin e marrëdhënieve ndër-shtetërore, forcimin e paqes në rajon dhe perspektivën e integrimeve euro-atlantike.
Një çështje e veçantë, e cila u diskutua ndërmjet të dy presidentëve, ishte edhe vrasja e djeshme e kryetarit të Iniciativës Qytetare “Liria, Demokracia, Drejtësia” (SDP) Oliver Ivanoviq. Lidhur me këtë çështje presidenti Thaçi ka siguruar presidentin Vuçiç se organet përgjegjëse të prokurorisë dhe policisë janë duke bërë hetime intensive për zbulimin dhe sjelljen përpara drejtësisë të atyre që e kanë bërë këtë vrasje.
Presidenti Thaçi gjithashtu theksoi se, organet kompetente të Republikës së Kosovës janë të gatshëm që në përputhje me legjislacionin në fuqi të bashkëpunojnë dhe të pranojnë çfarëdo ndihme, e cila mund të çojë drejt zbardhjes së kësaj vrasjeje.
Të dy presidentët theksuan domosdoshmërinë që t’u jepet kohë e mjaftueshme që organet kompetente të kryejnë punën e tyre në mënyrë profesionale dhe të pavarur. Ajo çfarë është kryesore në gjithë këtë çështje, është zbulimi i kryesve të kësaj vrasjeje, theksuan të dy presidentët”.
