Gjatë vizitës në Mitrovicë të Veriut, presidenti i Serbisë, Aleksandar Vuçiq, tha se Kosova është Serbi. E, presidenti i Kosovës, Hashim Thaçi, i ka quajtur ‘populiste’ deklaratat e djeshme të presidentit serb. Sipas Thaçit, të tillat janë të pashmangshme.
Hashim Thaçi, president i vendit i ka arsyetuar deklaratat e djeshme të presidentit serb në Mitrovicë të Veriut se Kosova është Serbi.
“Duke përjashtuar disa nga deklaratat populiste, të cilat janë pothuajse të pashmangshme në vizita të tilla, vizita e homologut nga Serbia u përmbyll pa asnjë incident”, shkruan Thaçi në Facebook.
Ndërkohë Thaçi, pret vazhdim të shpejtë të dialogut me Serbinë.
“Më vjen mirë që edhe homologu nga Serbia, gjatë qëndrimit në Republikën e Kosovës, ka theksuar disa herë rëndësinë e dialogut, si rrugën e vetme për normalizim dhe pajtim. Prandaj, unë besoj që shumë shpejt do të vazhdojmë dialogun ndërshtetëror në nivelin më të lartë politik, të ndërmjetësuar nga BE-ja dhe të përkrahur fuqishëm nga SHBA-ja”, shkruan Thaçi në Facebook.
“Duke u bazuar në këto parime, Republika e Kosovës do të vazhdojë me përkushtim dialogun për normalizimin e marrëdhënieve ndërshtetërore, deri në arritjen e marrëveshjes historike për paqen dhe pajtimin. Një marrëveshje e tillë është e domosdoshme, sepse ajo sjellë perspektivë të qartë për integrime euroatlantike për të dy shtetet”, shkruan Thaçi.
Delegacioni i Serbisë në Bruksel ka ndërprerë bisedimet me Kosovën për shkak të vrasjes së liderit serb të SDP’së në Mitrovicë të Veriut, Oliver Ivanoviq.
Shkrimi i plotë i Thaçit në Facebook:
Duke përjashtuar disa nga deklaratat populiste, të cilat janë pothuajse të pashmangshme në vizita të tilla, vizita e homologut nga Serbia u përmbyll pa asnjë incident.
Kjo sjellje civilizuese dhe tolerante dëshmon pjekurinë tonë qytetare dhe shtetërore. Toleranca dhe mirëkuptimi duhet të mbesin parime udhëheqëse edhe kur janë në pyetje marrëdhëniet ndërshtetërore në rajonin tonë.
Duke u bazuar në këto parime, Republika e Kosovës do të vazhdojë me përkushtim dialogun për normalizimin e marrëdhënieve ndërshtetërore, deri në arritjen e marrëveshjes historike për paqen dhe pajtimin.
Një marrëveshje e tillë është e domosdoshme, sepse ajo sjellë perspektivë të qartë për integrime euroatlantike për të dy shtetet.
Më vjen mirë që edhe homologu nga Serbia, gjatë qëndrimit në Republikën e Kosovës, ka theksuar disa herë rëndësinë e dialogut, si rrugën e vetme për normalizim dhe pajtim.
Prandaj, unë besoj që shumë shpejt do të vazhdojmë dialogun ndërshtetëror në nivelin më të lartë politik, të ndërmjetësuar nga BE-ja dhe të përkrahur fuqishëm nga SHBA-ja. HTH/express/
