Telefonët me palosje do të arrijnë në 30 milionë deri më 2023

E publikuar: 09/04/2019 01:44
Rreshtat+- AShkronjat+- Printo

Telefonët me ekrane me palosje do të përfaqësojnë 5% të tregut të rangut të lartë të smartfonëve deri më 2023. Ky është parashikimi i fundit i firmës analitike Gartner.

Sipas firmës numri i telefonëve me ekrane që palosen do të arrijë në 30 milionë në 2023. Sakaq deri në fund të 2019-ës, shitjet e telefonëve mobilë do të arrijnë në 1.8 miliardë, një rënie me 0.5% krahasuar me një vit më parë. Shitjet e telefonëve të rangut të lartë do të vijojnë rënien.

Në 2020-ën, telefonët mobil do të rikthehen tek rritja me 1.2%. kompjuterët tradicional do të bien me 3% në 2019-ën në një total prej 189 milionë njësi.

Në tërësi shitjet e kompjuterëve do të bien në 258 milionë njësi me 0.6%. Së fundi deri më 2021, Windows 10 do të instalohet në 75% të kompjuterëve profesionalë.

“Përgjatë pesë viteve të ardhshme, presim që telefonët me ekrane me palosje të mbeten produkte më shumë koncept sesa realitet për shkak të disa sfidave në prodhim. Gjithashtu me avancimin e teknologjive të ekraneve, presim që çmimi i tyre të bjerë. Aktualisht telefonët me ekrane me palosje kushtojnë 2,000 dollarë dhe shumica e tyre vinë me shumë komprometime madje edhe për adoptuesit e hershëm të teknologjive të reja.” /PCWorld Albanian