Kur kanë mbetur edhe tre javë nga fundi i Superligës së Shqipërisë, Skënderbeu është shpallur matematikisht kampion i Shqipërisë, duke u rikthyer te titulli pas një viti mungesë.

Ka qenë pikërisht Kukësi, skuadra që i rrëmbeu korçarëve titullin vitin e kaluar dhe që me humbjen e sotme në Durrës, i ka hapur shampanjën e festës Skënderbeut.

Skuadra e Ilir Dajës iu përgjigj thirrjes së presidentit Takaj dy ditë më parë në mbledhje, për të fituar titullin që këtë javë, duke fituar fillimisht 2-4 në Lushnjë dhe më pas duke nisur festën pas fitores së Teutës ndaj Kukësit në ‘Niko Dovana’.

Tashmë Skënderbeu ndodhet 11 pikë para Kukësit të vendit të dytë, ndërsa në lojë kanë mbetur vetëm 3 javë dhe rrjedhimisht 9 pikë për t’u diskutuar.

Ky ishte një titull tërësisht i merituar për Skënderbeun, që dominoi totalisht në kampionat, duke filluar nga java e parë.

Skuadra e Ilir Dajës, pavarësisht impenjimit në fazën e grupeve të Ligës së Evropës, ia doli të shkëputet që në dy fazat e para dhe të shkojë qetësisht te titulli kampion.

Ky është titulli i tetë kampion për Skënderbeun, ndërkohë, më 27 Maj korçarët do të diskutojnë edhe finalen e Kupës së Shqipërisë ndaj Laçit, duke pasur mundësinë që të fitojnë për herë të parë edhe këtë trofe. /SS/