Gjykata e Lartë në Indi e ka shpallur praktikën e divorcit të menjëhershëm në Islam si antikushtetues, duke shënuar një fitore të rëndësishme për aktivistët e të drejtave të grave.
Gjykata e quajti praktikën antiislamike në vendimin e saj. India është një nga disa vende, ku një burrë mysliman mund të divorcohet nga gruaja e tij brenda pak minutash, duke e thënë fjalën “Talaq” – divorc, – tri herë radhazi.
Vendimi historik i gjykatës vjen si reagim ndaj peticioneve, që sfidonin praktikën e quajtur “Talaqi i trefishtë”. Rasti u paraqit në gjykatë nga 5 gra myslimane, që ishin divorcuar në këtë mënyrë, të mbështetura nga dy grupe aktivistësh.
Vendimi është konsideruar nga këta të fundit si një fitore historike. Ka pasur raste, në të cilat burrat myslimanë në Indi janë divorcuar nga bashkëshortet e tyre duke shfrytëzuar të ashtuquajturin “Talaq të trefishtë”, përmes një letre, në telefon, apo edhe me mesazh SMS, në “WhatsApp” apo “Skype”.
Një numër rastesh të tilla kanë dalë nëpër gjykata, ndërsa gratë luftonin zakonin. Divorci në këtë mënyrë nuk përmendet në ligjin islamik të sheriatit apo në Kuran, edhe pse praktika ka ekzistuar prej dekadash.
Studiuesit islamikë thonë se Kurani e përcakton qartë problemin e divorcit: procesi duhet të zgjasë 3 muaj, gjë që i jep çiftit kohë për reflektim dhe pajtim. Shumë vende islamike, përfshirë Pakistanin dhe Bangladeshin, e kanë ndaluar praktikën, por zakoni mbetej i pranishëm në Indi, vend ky që nuk ka një set uniform ligjesh për martesën dhe divorcin, që aplikohen për çdo qytetar.
