Shefja e FMN-së: Sistemi financiar të bëhet më gjithëpërfshirës

20.01.2020 09:00
Rreshtat+- AShkronjat+- Printo
Shefja e FMN-së: Sistemi financiar të bëhet më gjithëpërfshirës

Hendeku midis të pasurve dhe të varfërve po rritet, brenda shumë vendeve dhe midis vendeve të botës. Pabarazia mund të çojë edhe në kriza ekonomike, paralajmëron Fondi Monetar Ndërkombëtar.

Pabarazia mund të çojë edhe në kriza ekonomike. Kjo konfirmohet nga një studim të cilin e prezantoi shefja e FMN-së, Kristalina Georgieva.

Të ardhurat dhe pasuria janë të shpërndara në mënyrë shumë të pabarabartë dhe hendeku po zgjerohet. Kjo sipas Georgievas është “një sinjal i rrezikshëm”. Ky zhvillim mund të ketë pasoja fatale.

“Kur pabarazia rritet, zakonisht është një parashikim i besueshëm i një krize financiare”, tha shefja e FMN-së.

Ky është rezultat i një studimi të gjerë të FMN-së, të cilit i referohet Georgieva. Ajo sheh në horizont një krizë financiare dhe ekonomike dhe gjithashtu shikon, se hendeku mes të varfërve dhe të pasurve po zgjerohet në të gjithë botën. Detyra e madhe e shoqërisë është krijimi i një sistemi financiar që përfshin shumë më tepër njerëz, që i nxjerr ata nga varfëria dhe i lejon të marrin pjesë në mirëqenie.

Rreziku i trazirave publike

Georgieva kujtoi se, “pabarazia e tepërt parandalon rritjen, ajo minon themelet e një vendi”. Dhe kjo rrezikon të shkatërrojë konsensusin shoqëror.

“Kjo shkatërron besimin në institucionet. Dhe mund të ushqejë rrymat populiste dhe të çojë në trazira publike”, tha Georgieva.

Si rezultat, shumë qeveri kërkojnë zgjidhje të shpejta dhe shpërndajnë dhurata për qytetarët – por kjo shumicën e herëve keqëson problemin.

Kristalina Georgieva ka reputacionin që është energjike dhe këmbëngulëse për çështje që i ka për zemër. Bullgarja e drejton Fondin Monetar Ndërkombëtar që nga 1 tetori. Para kësaj, ajo ishte numri dy i Bankës Botërore si Kryetare e Kryesisë, dhe gjithashtu ka punuar për shumë vite në Komisionin Evropian.

Studimi i FMN-së i paraqitur tani merr nën llupë lidhjen midis krizave ekonomike dhe pabarazisë gjatë 150 viteve të kaluara. Rezultati është i qartë: pa përjashtim, hendeku mes të ardhurave dhe pasurisë është thelluar, para ardhjes së kolapseve ekonomike. Kështu ka ndodhur para recesionit të bursës në vitin 1929, si dhe para krizës financiare më 2007. Dhe vitet “e zhurmshme njëzet”, vitet 1920, janë sipas studimit shembulli më i mirë i zhvillimit të gabuar social dhe ekonomik. Progresi teknologjik çoi fillimisht gjoja në një “epokë të artë” dhe më pas në katastrofë. Prandaj detyrën e saj në këtë dekadë Kristalina Georgieva e ka të qartë se, “ne duhet të parandalojmë që vitet 2020 të bëhen një përsëritje e viteve 1920”.

Paga pa kufi në sektorin financiar

Atëherë çfarë duhet bërë? Pabarazia midis vendeve është bërë më e vogël, gjë që ka çuar në zhvillim dhe mirëqenie më të madhe. Por problemi e rreziku qëndron tek pabarazia brenda vendeve. Dhe njëri nga shkaqet është industria e financave.

“Pagat pa kufi në sektorin financiar mund të çojnë në një sistem që i shërben vetes më shumë sesa shoqërisë”, tha ajo.

Studimi i FMN-së e kishte treguar qartë këtë: sa më thellë të shtrihet sektori financiar, sa më e madhe të jetë pjesa e tij në ekonomi, aq më i madh është ndikimi i tij në vendimet politike, aq më shpejt rritet pabarazia. Detyra është të rishkruhen rregullat dhe t’u jepet qasje më shumë njerëzve në sistemin e financimit. Kjo përfshin lehtësimin e huave për ndërmarrjet e vogla, sepse huatë për ndërmarrjet e mëdha rritin pabarazinë. Dhe për Georgievën një gjë është veçanërisht e rëndësishme.

“Mënyra më e mirë për të zvogëluar pabarazinë e të ardhurave është t’u jepet grave qasje më e mirë në mjetet financiare”, shtoi ajo.

Georgieva njoftoi se FMN do të mbajë parasysh përfundimet e studimit, kur të mbështesë projektet financiare në të gjithë botën. /Deutsche Welle/

Sqarim: Ndalohen fyerjet dhe përdorimi i gjuhës ofenduese. INFOSOT mban të drejtën e publikimit ose jo të një komenti të caktuar. Përmbajtja e komenteve nuk pasqyron, qëndrim editorial të redaksisë së portalit INFOSOT. Ju faleminderit për mirëkuptimin!


Partitë paralajmërojnë fushatë të tensionuar elektorale

Partitë paralajmërojnë fushatë të tensionuar elektorale

Gafa e Qeverisë Kurti, këshilltari i Kryeministrit nuk është Doktor Shkence

Gafa e Qeverisë Kurti, këshilltari i Kryeministrit nuk është Doktor Shkence

Pas të shtënave gjatë natës në Prishtinë, mbetët një i plagosur

Pas të shtënave gjatë natës në Prishtinë, mbetët një i plagosur

Mustafa i ashpër për taksën: Asnjë tarifë e reciprocitet nuk matet me peshën e partneritetit me SHBA-në dhe BE-në

Mustafa i ashpër për taksën: Asnjë tarifë e reciprocitet nuk matet me peshën e partneritetit me SHBA-në dhe BE-në

Veprim skandaloz, me vezë sulmohet zëvendëskryeministri Avdullah Hoti

Veprim skandaloz, me vezë sulmohet zëvendëskryeministri Avdullah Hoti

Abdixhiku ‘urdhër’ Komunës së Prishtinës për ta anuluar vendimin në lagjen në afërsi së Liqenit në Badovc

Abdixhiku ‘urdhër’ Komunës së Prishtinës për ta anuluar vendimin në lagjen në afërsi së Liqenit në Badovc

Të bashkuar LDK-ja, kërkojnë koordinim me SHBA’në për reciprocitetin

Të bashkuar LDK-ja, kërkojnë koordinim me SHBA’në për reciprocitetin

Sharon Stone: Përse jeta bëhet shumë më e mirë kur arrini moshën pesëdhjetëvjeçare!

Sharon Stone: Përse jeta bëhet shumë më e mirë kur arrini moshën pesëdhjetëvjeçare!

Ne, qytetarët e dorës së dytë

Ne, qytetarët e dorës së dytë

Zyrtarët policorë me probleme psikologjike kështu duhet të trajtohen!

Zyrtarët policorë me probleme psikologjike kështu duhet të trajtohen!

‘Kali i Trojës’ brenda Bashkimit Evropian!

‘Kali i Trojës’ brenda Bashkimit Evropian!

Serbia i liroi para kohe të dënuarit që ekzekutuan familjën Bogujevci!

Serbia i liroi para kohe të dënuarit që ekzekutuan familjën Bogujevci!

Zyba ka kërkuar shkarkimin e kryeshefes ekzekutive të Inspektoratit të Policisë së Kosovës

Zyba ka kërkuar shkarkimin e kryeshefes ekzekutive të Inspektoratit të Policisë së Kosovës

Albena Reshitaj, kërcënon me protesta

Albena Reshitaj, kërcënon me protesta

Qytetarët ankohen: Kryeministër, shih skelat pa mbrojtëse, të çarat i mbushin me shkumë e ikin

Qytetarët ankohen: Kryeministër, shih skelat pa mbrojtëse, të çarat i mbushin me shkumë e ikin

Ymeri: Albin, e ke gabim që ke ndryshuar veç pse jeni kryeministër

Ymeri: Albin, e ke gabim që ke ndryshuar veç pse jeni kryeministër