Administrata e presidentit amerikan Donald Trump dha leje që Ukrainës t’i shiten raketa kundërtanke “Xhevlin”, tha Pentagoni.
Çmimi i marrëveshjes eventuale shitblerëse do të jetë 47 milionë dollarë.
“Sistemi ‘Xhevlin’ do t’i ndihmojë Ukrainës në ndërtimin e kapacitetit të saj afatgjatë mbrojtës, që ta mbrojë sovranitetin dhe integritetin territorial dhe ashtu t’i plotësojë kërkesat për sigurinë e saj kombëtare”, thuhet në kumtesën e Ministrisë së Mbrojtjes së SHBA-së.
Në të thuhet se shitja eventuale nuk do ta ndryshojë baraspeshën ushtarake në rajon.
Departamenti i Shtetit, prej të cilit varet leja për shitjen e tillë, e ka informuar Kongresin se ka për qëllim ta miratojë atë. Tani, Kongresi ka 30 ditë ta bllokojë, por mediat amerikane vlerësojnë se nuk pritet një gjë e tillë.
Kongresmenë republikanë dhe demokratë moti lobojnë që të ndodh kjo shitje.
Në informatën për Kongresin, Departamenti i Shtetit potencon se ka për qëllim të shesë gjithsej 37 komplekse me 210 projektime amerikane “Xhevlin”. Raketat do të furnizohen nga rezervat ekzistuese të ushtrisë amerikane/GazetaExpress/
