Sa herë që regjistrohet një veturë, qytetarët i paguajnë taksë Qeverisë së Kosovës në emër të mbrojtjes së mjedisit.
Vetëm në vitin 2017 në buxhetin e Kosovës janë inkasuar mbi tre milionë të hyra nga taksa ekologjike, raporton KTV.
Por, ky buxhet asnjëherë deri tash nuk ka shkuar direkt në Ministrinë e Mjedisit, pavarësisht insistimit të këtij dikasteri.
Ndërsa, për vitin 2018, nga buxheti i shtetit për investime kapitale në mjedis janë ndarë vetëm 1 milion e 895 mijë euro.
Njohësit e mjedisit thonë se jemi në shkallë kritike dhe është e domosdoshme që mjetet e grumbulluara nga taksa ekologjike të destinohen për mbrojtjen e tij.
Edhe qytetarët që paguajnë taksën ekologjike thonë se paratë e grumbulluara duhet të destinohen për atë çka kanë paguar, mjedisin.
Në Ministrinë e Financave kanë thënë se të gjitha të hyrat e inkasuara aktualisht grumbullohen në llogarinë e Buxhetit të Kosovës, e që shpërndahen sipas prioriteteve të Qeverisë, si dhe kërkesave për projekte nga organizatat buxhetore.
