Rasti i foshnjës së mbytur në Viti. Çfarë dihet deri më tani

E publikuar: 30/08/2017 14:50
Rreshtat+- AShkronjat+- Printo

Babai monstër që vrau foshnjën e tij në Viti, duke e hedhur atë në një përroskë afër shtëpisë në fshatin Letnicë, nuk e kishte pranuar se foshnja e porsalindur ishte i tij. Gazeta Express po qëndron në vendin ku ka ndodhur dje krimi që po trondit gjithë Kosovën. Detajet e mëposhtme tregojnë se si ka ndodhur i gjithë rasti.

Xhevat Kosumi, vëllai i të dyshuarit për vrasjen (Xhezmi Kosumi – 60 vjeçar), ka thënë se Zejnije Sylejmani “ka qenë me sëmundje mendore”.

Mirëpo, sipas informacioneve të siguruara nga Gazeta Express, mjekët kanë mohuar se ajo të ketë pasur gjendje të rëndë psikike, ashtu siç ka thënë familjari i Xhezmi Kosumit.

Është konfirmuar se gruaja aktualisht është duke marrë tretman mjekësor në Spitalin Regjional të Gjilanit, derisa mjekët në QKMF në Viti kanë treguar se gjendja psikike e gruas ka qenë e turbullt, por nuk mund të konstatojnë për gjendje të rëndë mendore.

Rasti, fillimisht është iniciuar në polici nga mjekët e QKMF’së në Viti. Gruaja është sjellë në QKMF të kërkojë ndihmë për gjakderdhjen pasi ka lindur foshnjën, edhe pse familjarët kanë mohuar se ajo ka pasur lindje, shkruan Gazeta Express.

Më pas, sipas informacioneve të siguruara nga Gazeta Express duke qëndruar në vendin e ngjarjes, gruaja u ka deklaruar vetë mjekëve se ka lindur, ndërsa nuk e ka ditur se ku e ka fëmijën. Kështu, mjekët kanë shkuar në shtëpi për ta mjekuar foshnjën e porsalindur (e gjinisë femër) dhe, sipas mamisë e cila ka qenë e pranishme, burri i saj, Xhezmi Kosumi, kishte insistuar se ajo nuk ka kryer lindje, por gjakderdhja i kishte ardhur pasi e kishte goditur në kokë.

Pas kësaj, mjekët e QKMF’së e kanë informuar policinë, të cilët me të ardhur në vendin e ngjarjes kanë gjetur trupin e foshnjës në përroskën afër shtëpisë, në fshatin Letnicë.

Zejnije Sylejmani (40 vjeçare) aktualisht ndodhet në Spitalin Regjional të Gjilanit, pas transferimit që iu bë dje nga QKMF e Vitisë.

Bëhet e ditur se gjendja e saj momentalisht është stabile./GazetaExpress/