Dy ditë para ndeshjes Shqipëri-Serbi, ku emocionet ndihen më të forta, kreu i qeverisë, Edi Rama, kujton të gjithë tifozët se sjellja e tyre është imazhi i Shqipërisë.
Duke i bërë ftesë sportdashësve që të ndjekin ndeshjen e 8 tetorit në ekranin e madh në Kryeministri, Rama i paralajmëron.
Kryeministri Rama u kujton tifozëve se, ajo që ka rëndësi më shumë në këtë ndeshje është fitorja e imazhit të Shqipërisë.
“Kuqezinjtë përballë fqinjëve serbë të enjten 8 tetor ora 20.30 në parkun e Kryeministrisë. Fitorja na çon direkt në Francë 2016. Barazimi është një tjetër hap drejt Evropianit. Humbja lë gjithçka të hapur.
Por mbi të gjitha, duhet të fitojë imazhi i Shqipërisë mikpritëse, dinjitoze, europiane, në një ndeshje futbolli, ku e tërë bota përveç nesh, nuk do të shohë rezultatin e ndeshjes po mbarëvajtjen e takimit të kthimit në Shqipëri, një vit pas shpërthimit të dhunshëm në fushën e Beogradit.
Prandaj le të nderojmë traditën shqiptare dhe ambicien europiane, duke dhënë një provë bindëse se ky është vendi i të ardhmes jo fushëbeteja e të shkuarës”, thuhet në mesazhin e Ramës, publikuar në “Facebook”./Shekulli
