Punëtorët e Pallatit të Drejtësisë kanë bërë të ditur se nga sot do të jenë në protestë për shkak të kushteve të këqija të punës, përkatësisht mungesës së oksigjenit, e që për pasojë disa punëtorë kanë pasur probleme shëndetësore.
Sindikata e Judikaturës e Gjykatës Themelore në Prishtinë në mbledhjen mbajtur me 25.03.2016, ka vendosur unanimisht për ndërprerjen e punës në Pallatin e Drejtësisë.
“Punonjësit e kësaj gjykate vendosen se duke filluar që nga sot me datë 29.03.2016, do të ndërprerjen punën nga dy orë në ditë, prej orës 13 deri në ora 15. Kjo formë e protestës do të vazhdoj deri në riparimin e sistemit të ajrosjes në këtë objekt. Nëse organet kompetente nuk marrin masa në plotësimin e kësaj kërkese, punonjësit paralajmërojnë ndërprerje totale të punën në ndërtese”, thuhet në njoftimin e punëtorëve.
Protestës i janë bashkangjitur institucionet tjera të akomoduara në Pallatin e Drejtësisë si Gjykata Supreme, Gjykata e Apelit, Prokuroria e Apelit dhe ajo Themelore.