Publikohen shpalljet e Facebook-ut që dyshohet se janë paguar nga rusët

E publikuar: 12/10/2017 10:57
Rreshtat+- AShkronjat+- Printo

Anëtarët e Komitetit të Inteligjencës së Dhomës Përfaqësuese të Shteteve të Bashkuara thonë se do t’i publikojnë mijëra shpallje të Facebook-ut, që dyshohet se janë blerë nga operativistët rusë, gjatë zgjedhjeve presidenciale amerikane të vitit të kaluar.

Anëtarët e Dhomës Përfaqësuese, Mike Conaway dhe Adam Schiff, u thanë reporterëve pas takimit të mbrëmshëm me shefen ekzekutive të kompanisë Facebook, Sheryl Sandberg, se ata po punonin me kompaninë për publikimin e shpalljeve.

Ne kemi kërkuar ndihmë nga Facebook-u për pastrim të çfarëdo informacioni identifikues personal, por shpresojmë se kur kjo të kryhet ne mund t’i publikojmë ato për opionin”, tha Adam Schiff (demokrat).

Mike Conaway tha se është vështirë që shpalljet do të mund të publikoheshin para dëshmisë së kompanisë Facebook në Kongresin e Shteteve të Bashkuara, më 1 nëntor, për ndërhyrjen ruse në zgjedhje.

Conaway (republikan) dhe Sandberg i thanë Komitetit të Inteligjencës së Dhomës Përfaqësuese, që ishte e mbyllur, se Facebook po punon në mënyrë të vazhdueshme për t’i siguruar amerikanët që ta “kuptojnë se çka është propaganda, të cilën ata mund ta lexojnë ose jo”.

Ky komitet është njëri prej disa paneleve të Kongresit të Shteteve të Bashkuara, që zhvillojnë hetime për akuzuat për përzierje ruse në zgjedhje.

Aktualisht, rrjeti Facebook i ka furnizuar këto panele me më tepër se 3 mijë shpallje përçarëse politike, për të cilat besohet se ishin blerë nga operativistët rusë.

Mëtutje, Facebook tha se shpalljet ishin shpërndarë në këtë rrjet gjatë muajve para dhe pas zgjedhjeve në Shtetet e Bashkuara.

Pas zbulimit nga ana e rrjetit Facebook, për shpalljet e financuara ruse, për të cilat ka thënë se duket se synonin përçarjen në mesin e votuesve amerikanë, për çështjet siç janë homoseksualiteti, raca dhe imigracioni, zbulime të tilla të ngjashme aktualisht janë bërë edhe nga kompanitë Google dhe Twitter.

Të tri kompanitë, Facebook, Google dhe Twitter, do të dëshmojnë publikisht për ndërhyrjen ruse para paneleve të inteligjencës në Senat dhe në Dhomën Përfaqësuese më 1 nëntor.

Megjithatë, derisa Facebook dhe Twitter e kanë konfirmuar pjesëmarrjen e tyre në këto dëgjime, Google ende nuk e ka bërë këtë.

Përgatiti: Fatmir Bujupi