Papa Françesku i ka kërkuar ndjesë viktimave që kanë rënë pre e abuzimeve seksuale nga klerikët katolikë, dhe i ka siguruar ata se çdo pretendim i tyre tani e tutje do të trajtohet me përgjegjësinë dhe seriozitetin më të lartë. Kreu i Kishës Katolike u kërkoi abuzuesve që të pranojnë fajet në mënyrë që të përfitojnë nga drejtësia hyjnore.
Papa Françesku u ka kërkuar klerikëve katolikë të akuzuar për ngacmime seksuale se Kisha nuk do të jetë në krahun e tyre.
Në fjalën e tij të përvitshme përpara organit qeverisës të Vatikanit, papa pranoi se Kisha Katolike i ka trajtuar përciptas disa nga pretendimet e viktimave ndër vite.
Papa Françesku: Po e bëj të qartë se turpe të tilla nuk do të falen nga Kisha, dhe do të ndërmarrim të gjitha veprimet e nevojshme për të vënë para ligjit të gjithë ata që i kanë kryer. Është fakt i pamohueshëm që në të kaluarën, me papërgjegjshmëri, skpeticizëm, por edhe prej mungesës së përvojës ose dritëshkurtësisë shpirtërore e njerëzore, për shumë raste të abuzimit të të miturve nuk është treguar gatishmëria e duhur. E gjithë bashkësia katolike ka vendosur që kjo të mos ndodhë më. Ndërsa atyre që abuzojnë me të miturit do t’u thosha: konvertohuni dhe dorëzohuni përpara drejtësisë njerëzore që t’ju presë drejtësia hyjnore.
Vitet e fundit, Kisha Katolike është fajësuar për një sërë skandalesh me abuzimin e fëmijëve, ndërsa vetëm javën e kaluar kreu i saj shkarkoi dy kardinalë nga rrethi i tij i ngushtë të akuzuar për ngacmime seksuale.
Sipas viktimave, pretendimet e tyre ishin anashkaluar nga kleri katolik.
Abuzimet seksuale nga përfaqësuesit e Kishës do të jenë edhe fokusi i një konference të jashtëzakonshme që Papa Françesku pritet të thërrasë në 21 deri në 24 shkurt në Vatikan.
