Njohësi i çështjeve të arsimit Rexhaj thotë se është koha e fundit që të përmirësohet gjendja në arsim

E publikuar: 05/12/2019 18:30
Rreshtat+- AShkronjat+- Printo

Profesori universitar, Xhavit Rexhaj, ka thënë se rezultatet e testit PISA për Kosovën kanë fundosur anijen.

Rexhaj në një intervistë për “Përballje ditore” në Telegrafi.com ka thënë se duhet të identifikohen pikat e dobëta që kanë dalë nga ky test.

Ai ka thënë se nuk është vetëm testi PISA dështim i Kosovës në fushën e arsimit, pasi që sipas tij edhe vendi ka dështuar edhe me largimin nga ENQA, dhe se sipas tij dështimi përgjegjësia është zinxhirore.

“Është dëmtuar baza e ministrisë…. Është sistem zinxhiror i dëmtuar nga partitë e kaluara. Tani vota e popullit ka qenë votë e revoltës. Kushdo që nuk e kupton këtë votë të revoltës, do të dështoj. Kushdo që nuk e kupton që në arsim, shëndetësi e fusha tjera nuk shkohet më me njerëz që nuk dinë me udhëheq, do të dështoj. Tash a duam ta bëjmë politiken e tenderëve apo të zhvillimit të arsimi”, ka deklaruar ai duke shtuar se duhet marrë shembull nga Maqedonia e cila është ngritur.

“Maqedonia ka 40 pikë më shumë në këtë test, dhe është ngritur në krahasim me testin e kaluar. Arsyeja se është marr me vetën dhe tani është shkëputur nga zona e turpit. Pse nuk mundemi ne ta bëjmë këtë. Pra duhet të kthehemi kah fëmijët jo kah tenderi. Kushdo që vije në Ministri për herë të parë është ta bëjë mbyllen e dyerve të MASHT-it që të mos hyjnë njerëzit që nuk kanë njohur”, ka thënë ai.

Ndër të tjera Rexhaj ka folur edhe për zgjidhjen që duhet bërë në këtë aspekt që të mos përsëriten dështimet.

“Kurrikula punon shumë me vështirësi. Bota ka ecur nga digjitalizimi, drejt teknologjitë e reja, rrjeteve sociale. Para 7 viteve e ka bë ministria një komision për tekste dhe po mburren, por ata është dashur të bëjnë komision për digjitalizim. Duhet patjetër të ndryshojmë sepse jemi bërë turpi i botës. Ka njerëz të mençur, por nuk po u jepet hapësirë. Qeveria e ardhshme duhet të krijojë hapësirë për njerëz të dijes. LDK ka më shumë kapacitete në arsim por nuk mundet të bëjë përmirësim e vetme. Duhet të mblidhen të gjithë bashkë që të rregullohet kjo çështje”, ka deklaruar ai.
Ai ka përmendur disa ekspert, që sipas tij janë të duhuri që të rregullojnë gjendjen në arsimin kosovar.

“Kemi ekspert të kësaj fushe, por nuk po iu lënë mundësitë. E kemi Agron Dida, i cili është në nivel evropian të dijes dhe i shkathtësisë në fushën e vetë. Është ekspert kulminant. Për një ekspert ë tillë një shtet investon miliona dhe e formon. Ndërsa ne e kemi e këta mundohen në çfarëdo mënyrash e largojnë, nuk e pyet askush asgjë. Ai e ka hapur një faqe dhe mundohet aty ta jap kontributin. Pastaj është Blerim Saqipi, Dukagjin Pupovci, Selim Mehmeti, pra ka njerëz. Arsimi duhet të zhvillohet mbi politika kombëtare jo grupore e politike. Është momenti i fundit që Qeveria e ardhshme të iu krijojë hapësirë këtyre ekspertëve”, ka thënë ai.

Kujtojmë se në testin PISA, Kosova rangohet e treta nga fundi i listës me 79 vende.