Lidhja Demokratike e Kosovës ka mbajtur sot mbledhjen e radhës së Kryesisë së partisë.
Të tilla takime janë thirrur shpesh kohëve të fundit në prag të mbajtjes së Kuvendit Zgjedhor, nesër më 3 gusht, shkruan lajmi.net.
Qëllimi kryesor i këtyre takimeve ishte gjetja e një kandidati konsensual, të pranueshëm për të gjithë delegatët e LDK-së.
Burimet e lajmi.net brenda LDK-së kanë treguar se në mbledhjen e sotme është arritur konsensus i shumicës që Isa Mustafa të jetë kandidat për kryetar.
Të njëjtat burime thonë se të gjithë e kanë pranuar një zgjedhje të tillë, me përjashtim të nënkryetarit të partisë, njëherit edhe kryetarit të Podujevës, Agim Veliu.
Gjithmonë sipas burimeve, Veliu është i bindur që mund t’i fitojë zgjedhjet për të udhëhequr me LDK-në, dhe në këtë formë ta rrëzojë nga froni kryetarin aktual, Isa Mustafën.
Një gjë të tillë, Veliu e la të kuptohet edhe pas mbledhjes së kryesisë me një deklaratë të tijën.
Ai tha se secili brenda LDK-së ka të drejtë dhe mund të kandidojë për të parin e partisë.
