Kuvendi i Kosovës në seancën e sotme ka shqyrtuar tri projektligje për FSK-në.
Fillimisht me shumicë votash është miratuar në lexim të parë projektligji për ministrinë e Mbrojtjes me 101 vota pro.
Pas kësaj ministri i FSK-së, Rruste Berisha tha se pas këtij miratimi parashihet transformimi i FSK-së në ministri të Mbrojtjes, shkruan lajmi.net.
Me 98 vota pro, Kuvendi miratoi në lexim të parë projektligjin për krijimin e Forcës së Sigurisë së Kosovës.
Po ashtu, deputetët e Kuvendit me 96 vota pro miratuan shqyrtimin e parë të projektligjit për shërbim në Forcën e Sigurisë së Kosovës.
Gjatë seancës plenare të gjithë deputetët e Kuvendit u shprehën se janë pro krijimit të Ushtrisë së Kosovës, ndërsa Lista Serbe duke kundërshtuar projektligjet për ushtrinë e lëshuan sallën e Kuvendit.
Deputeti i kësaj Liste, Igor Simiq u shpreh se transformimi i FSK-së në ushtri nuk është në interes të komuniteteve.
Ndërsa, kryeministri i vendit, Ramush Haradinaj ka deklaruar se sot ishte një prej ditëve më përcaktuese për vendin në konsolidim të shtetit dhe në rrugën drejt NATO-s.
Haradinaj ka thënë se me votimin në lexim të parë të pakos së ligjeve për FSK-në, deputetët e Kuvendit vulosën të drejtën e shtetit tonë sovran për tranzicionin e FSK-së në mandat ushtarak dhe mbrojtës, ofruese e sigurisë për të gjithë qytetarët dhe komunitetet.
