Të panevojshme e cilëson avokati i Aulon Zekës vendimin e Gjykatës së Apelit që lënda të kthehet në rigjykim dhe rivendosje.
Një ditë më parë, Gjykata e Apelit e anuloi aktgjykimin e Gjykatës Themelore në Prishtinë, në rastin e të miturve G.H., R.G. dhe L.Ll, raporton KTV.
Kjo me arsyetimin se kolegji i Apelit gjeti se aktgjykimi i gjykatës së instancës më të ulët ka shkelje esenciale të dispozitave të procedurës penale.
Por, avokat i familjes Zeka thotë se këto shkelje procedurale do të mund të evitoheshin gjatë gjykimit të shkallës së parë.
Pasi që lënda do të kthehet në rigjykim, Skënder Musa, avokat i familjes Zeka thotë se familja do të kërkojë dënimin maksimal për tre të miturit, në veçanti për të miturën R.G.
Ndërsa babai i të ndjerit Aulon Zeka, Afrimi, përmes telefonit, i ka thënë KTV-së se ka vërejtje si është trajtuar lënda, pasi që në aktakuzë nuk janë përfshirë të gjitha çështjet sa i përket të miturës, por ajo është akuzuar vetëm për një pikë.
Në prill të këtij viti, Gjykata Themelore në Prishtinë e dënoi me 9 vjet e 6 muaj burgim të miturin G.H. për veprat vrasje e rëndë dhe armëmbajtje pa leje.
Ndërsa të miturve G.H. dhe L.LL., Themelorja iu kishte shqiptuar masa edukativo-korrektuese dhe mbikëqyrje të shtuar.
Tre të miturit akuzohen se në shtator të vitit të kaluar e kishin vrarë 16-vjeçarin Aulon Zeka.
