Lista Serbe nuk do të ndryshojë sjellje as në qeverisjen e re në Kosovë.
Ky subjekt ka paralajmëruar konsultim paraprak me Beogradin lidhur me vendimin se a do të jenë ose jo pjesë e institucioneve të Kosovës në mandatin e ardhshëm, shkruan lajmi.net.
Kështu ka paralajmëruar edhe anëtari i Kryesisë së Listës Serbe, Sllavko Simiq.
Ai për mediat serbe ka thënë se subjektit të cilit ai bën pjesë, i takojnë pozicione të caktuara në qeveri.
“Ata në Prishtinë duhet të dinë nëse dëshirojnë të formojnë Kuvendin e Kosovës se është e nevojshme që Lista Serbe të emërojë një anëtar të kryesisë, domethënë të emërojë dhe votojë një zëvendëskryetar të kuvendit, pasi kërkohet pëlqimi i kryetarit të Listës Serbe për të përcaktuar qeverinë e ardhshme”, tha ai për “Tv Prva”.
E të enjten, drejtori i të ashtuquajturës zyrë për Kosovën në Qeverinë e Serbisë, Marko Gjuriq tha se Lista Serbe duhet të insistojë që të jetë pjesë e Qeverisë.
Sidoqoftë, me këtë nuk pajtohet kryetari i partisë fituese të këtyre zgjedhjeve, Albin Kurti, i cili Listën Serbe në mandatin e ardhshëm e sheh si opozitë.
