Po vazhdon seanca e Kuvendit të Kosovës ku po diskutohet për marrëveshjen me Serbinë më 4 shtator në Uashington.
Shefi i Grupit Parlamentar të LDK-së, Arben Gashi, tha se marrëveshja në Uashington qartësoi dy gjëra, atë të parashikimeve se në SHBA po ndahet Kosova, dhe atë mbi legjitimitetin e kryeministrit Hoti, shkruan lajmi.net.
“Ne duhet t’i diskutojmë dy gjëra: Debati politik është demonizuar nga akuzat se në Uashington po ndahet Kosova. Pika e dytë është se kryeministri Hoti dhe roli i tij do të ishte si asistent i Thaçit. Këto dy gjëra i ka qartësuar marrëveshja në Uashington”, tha Gashi.
Tutje, ai tha se qytarët e Kosovës duan punë e siguri, dhe se marrëveshja në Uashington, nuk ishte akt kapitullimi.
“Qytetarët janë lodhur me fjalime e poza patriotike. Njerëzit duan punë e siguri. Marrëveshja në SHBA nuk është akt kapitullimi si marrëveshja e Kumanovës. Sot me të drejtë na duket që çdo konçesion nga bashkësia ndërkombëtare është i padrejtë. Serbia nuk e ka paguar çmimin për shkatërrimet në masë që ka shkaktuar në Kosovë. Kjo marrëveshje mund të marrë kohë, por relacionet fqinjësore nuk duhet të jenë të tilla që shkojnë drejt një konflikti të ri”, tha tutje ai.
Ai foli edhe për pikat problematike të marrëveshjes, Ujmanin dhe minishengenin. Për të parën tha se nuk ka bashkëpronësi të këtij aseti natyror, por vetëm përdorim i përbashkët.
“Marrëveshja e Uashingtonit e ka kthyer Kosovën në planin ndërkombëtar, dhe argumenti i saj, si një argument kryesor. Janë dy pika që meritojnë debat: Ujmani dhe minishengeni. Sa i përket Ujmanit, që pjesa më e madhe gjindet në Kosovë dhe një pjesë në Serbi, duhet insistuar që kur të përpilohet studimi i fizibilitetit dhe çdo përdorim i përbashkët ta ketë këtë postulat. Sa i përket minishengenit, ne do të insistojmë që kjo marrëveshje e tregtisë së lirë, të jetë mes shteteve, pra Kosova të hyjë aty si shtet dhe si palë e barabartë”, tha ai.
