Me qëllim të implementimit të Programit Nacional për Rininë edhe për studentët e Kolegjit Heimerer, Rexhep Hoti, Koordinator Nacional për Kulturë, Rini dhe Sport në Qeverinë e Republikës së Kosovës, nënshkroi memorandum bashkëpunimi me Zëvendësdrejtoreshën e bordit të këtij kolegji, Naime Brajshori.Koordinatori Hoti tha se ky program parasheh përfshirjen e rreth 110.000 studentëve nga të gjitha universitetet dhe kolegjet e Kosovës në garën e sportit dhe kreativitetit kulturor e mendimit kritik si një mundësi për të treguar talentet e tyre.
“Me Programin Nacional për Rininë studentët do të kenë mundësi që të marrin pjesë në një garë që është e hapur për të gjithë studentët në Republikën e Kosovës pa dallim. Studentët do të kenë mundësi të tregojnë aftësitë e veta sportive e kreative dhe më të mirët e këtyre fushave do të shpërblehen. Ky program nuk është vetëm garë, por është filozofi në vete sepse do të zhvillojë frymën garuese dhe do të zhvillojë mendimin kritik në mesin e të rinjve”, tha Koordinatori Hoti.
Në anën tjetër, zëvendësdrejtoresha Brajshori tha se e kanë mirëpritur idenë e bashkëpunimit me Koordinatorin Hoti. “Ne si kolegj jemi shumë të gatshëm ta mbështesim këtë program. Si rezultat i këtij bashkëpunimi dhe asistimi të ndërsjellët, studentët tanë do të jenë pjesë e aktiviteteve që synojnë promovimin dhe zhvillimin e kulturës, sportit e diturisë”, theksoi Brajshori.
Edhe udhëheqësi i kolegjit Nehat Mustafa premtoi mbështetje për aktivitetet e programit duke thënë se do të kenë të gatshëm 100 studentë vullnetarë për të ndihmuar në zbatimin e projektit.
Në takim Hoti u shoqërua nga zëvendësministrja e Kulturës, Rinisë dhe Sportit Leonora Morina-Bunjaku si dhe zëvendësministri i Arsimit, Shkencës dhe Teknologjisë Azem Guri. Ata dhanë mbështetjen e ministrive që përfaqësojnë për Koordinatorin Hoti duke thënë se presin që ky program të ndikojë pozitivisht në ngritjen e cilësisë në arsim.
Marrëveshja e bashkëpunimit përcakton angazhimet e ndërsjella të palëve nënshkruese për implementimin e Programit Nacional për Rininë dhe për organizimet e përbashkëta të aktiviteteve që kanë të bëjnë me përfshirjen e studentëve në garat e kreativitetit kulturor dhe mendimit kritik si dhe të sportit.
