Në dy grupe janë ndarë punonjësit shëndetësorë në Qendrën Klinike Universitare të Kosovës. Kjo ka ndodhur pasi që kolegjiumi i kirurgëve të QKUK-së janë duke e vazhduar grevën tash e 15 ditë të ndarë prej Federatës së Sindikatave të Shëndetësisë së Kosovës, pasi që, sipas tyre, kjo sindikatë nuk po ua përfaqëson denjësisht kërkesat, shkruan sot Koha Ditore.
Federata e Sindikatave e Shëndetësisë së Kosovës në mbledhjen e Këshillit Drejtues të mbajtur të enjten ka vendosur që greva, e cila është mbajtur tri ditë në të gjitha institucionet shëndetësore publike, të pezullohet dhe t’i hapet rruga dialogut social me Qeverinë sipas afateve të premtuara për miratimin e Ligjit për paga.
Blerim Syla, kryetar i Federatës së Shëndetësisë së Kosovës, ka thënë se greva e mjekëve është pezulluar me vendim të Këshillit Drejtues, ndërsa si arsye të ndërprerjes së grevës i ka përmendur premtimet që i kanë dhënë Ramush Haradinaj e Kadri Veseli për plotësimin e kërkesave të tyre.
