Mesfushori i talentuar i Romës, Nicolo Zaniolo ka përfunduar në listën e dëshirave të Juventusit.
Italiani erdhi nga Interi në verë te Roma si pjesë e marrëveshjes për transferimin e Radja Nainggolan dhe ka befasuar të gjithë me nivelin e treguar.
Zaniolo ka shkëlqyer me ekipin nga Olimpico, duke shënuar tre gola në pesë ndeshjet e fundit të tij për Giallorossi.
Paraqitjet e tij mbresëlënëse me Romën kanë bërë që shumë skuadra të mëdha evropiane të vihen pas tij.
Njëra nga to padyshim se është edhe skuadra e madhe italiane, Juventusi, që e do lojtarin në verë.
Sipas gazetës Tuttosport, Zonja e Vjetër po shikon mundësitë për transferimin e talentit Zaniolo gjatë verës së këtij vitit.
19-vjeçari ka dalë si një objektiv për Juventusin, pasi ata synojnë të rrëmbejnë të gjithë talentet më të ndritshëm në futbollin italian.
Përveç Juventusit interesim për adoleshentin e talentuar italian kanë shprehur edhe Real Madridi dhe Arsenali. /Telegrafi/
