Anthony Joshua thotë se është i gatshëm të ndeshet qoftë me Tyson Furyn apo Deontay Wilderin, pas duelit ndërmjet tyre në Los Angeles që përfundoi baras.
Boksieri amerikan e nokautoi dy herë kundërshtarin e tij, ndërkohë që boksieri britanik kishte fituar më shumë pikë gjatë raundeve.
Meçi mes Tyson Fury dhe Deontay Wilder përfundoi baras (Foto: Harry How/Getty Images/Guliver)
Duke qenë se meçi u mbyll baras me vendim të gjyqtarëve, titulli WBC mbeti te Wilder, ndërkohë që shumëkush e ka uruar Furyn për paraqitjen e mirë.
Pas duelit Deontay deklaroi se do ta dëshironte rimeçin me Tysonin, por edhe duelin e shumëpritur me Joshuan. Ndërkohë, menaxheri i tij, Shelly Finkel, ka thënë se klienti i tij e dëshiron me ngulm përballjen me AJ.
Kampioni i unifikuar, Anthony Joshua (Foto: Richard Heathcote/Getty Images/Guliver)
Dhe duke iu referuar deklaratës së Finkel, Joshua ka thënë se amerikani e deshi meçin ndaj Furyt, sepse mendonte se është kundërshtar më i dobët.
“Pse iu desh kaq gjatë këtij budallai? Sikur ne të mos ishim të interesuar?! Sidoqoftë, ia dole për mrekulli Fury! Ata të deshën ty, sepse menduan se kishe mbaruara! Do të përballemi kurdo që të jeni gati! Cilido nga ju!”, ka shkruar Joshua në Twitter.
What took this fool so long? Like we ain’t been interested?!! 🙄Anyway well done Fury! they wanted to get you because they assumed you was finished!! I’ll give you a fair one when your ready! Either one of you! https://t.co/RlytsIrnud
— Anthony Joshua (@anthonyfjoshua) December 4, 2018
29-vjeçari AJ e ka të caktuar datën 13 prill 2019 për meçin e radhës, mirëpo akoma nuk është vendosur se cili do të jetë kundërshtari i tij. /Telegrafi/
