Adelina Ismaili, e njohur si diva e muzikës moderne shqiptare, pas një shkëputjeje të gjatë, ka vendosur të rikthehet, edhe pse pak javë më parë, gjatë një koncerti në Gjilan, tha se nuk do të kthehet më në muzikë, por do të jetë pranë publikut të saj si aktore.
I pari projekt të cilin ajo do ta vërë në jetë shumë shpejt është seriali komedi “O sa mirë në Kosovë”, ndërsa këtë javë, Ismaili do të jetë në Tiranë si e ftuara speciale e Festivalit të RTSH-së. Kozeta Kurti, zëdhënëse e Fest ’56, zbulon se një tjetër surprizë e këtij edicioni do të jetë Adelina Ismaili.
“Një personalitet i rrallë artistik që prodhoi showbiz-i shqiptar i viteve ‘90-të, pritet të ngjitet në skenën e Festivalit më të madh në vend. Plot këngëtare të tjera tentuan të ndiqnin gjurmët e saj, por mbetën përpjekje të mundimshme që filluan e mbaruan me veshjen, look-un, sepse askush nuk i afrohej dot kurajës skenike të artistes nga Kosova, as sharmit te saj, as rebelizmit.
Ka mall për Adelina Ismailin, që kur vrau frikën për skenën madhështore të Festivalit, me “Mos ma gjuj diellin me gur“, ka mall për të që kur zhveshi më shumë se sa veten nga rrobat, mentalitetin e ndrydhur të një populli që për gjysmëshekulli jetoi në izolim e qasja ndaj së resë, kishte vështirësi për pranim.
Pas një karriere që ka njohur veç rritje në kurbën e saj, me një pjekuri artistike për t’u admiruar, Adelina Ismaili është vlerë e shtuar për institucionin e Festivalit, si një nga të ftuarat speciale të këtij edicioni.”/Class/
